أخر الأخبار

النداس


AbuDariAlAhwazi

مشكلتنا مع أنّداس:

 

فرد نوب وصرخ، صرخ صرخة حیل غير عاديّة ! ها ولك اشمالك ؟. گال گرصني ( ندّاس) , طفر عليه عبيّس : يابه خوّفتنا,!. معما چنّة متعودين على گرصات ( ندّاس ال….) ولاچن صرخة ,,خروطي ,, صرخ من كل گلبه , يعني حتى دموع عيونه طفرن..

گاله عبّیس : ما گلنالک لا تچب ماي أبزرف أنّداس؟. گاله انچب وللهّ ما انچب اهوه خبیث و یگرصنا!,

الحگیگة كلّحّنا متعودين على گرصات انّداس لآن چنة ابطرج الدشداشة ومن غير مگصّر, چانت الأرض ترابها ابيّض ما بيه ملح مثل هسّة , چانت أرضنا بيها الخيرات والنعمة وچان بيها أنواع الحيوانات الاهلية والوحشية وانواع الحياية والعجارب وامشيط حيّة وديدان أخرى ومنها ( گراص ال…) وهذه گرّاص ال.. الخبیث هو عبارة عن دودة طويلة و جدّام حلگه اله اثنين افچوچ صلبات ايعض بيهن , فهو يييّ حدر التراب بدون ما ينشاف وكلشّ ليتمه ما يوصل حدر الشخص يگرصه وتبگه گرصته اشچم يوم بچانها اسود وحتى اتورّم ( ال…) ولاچن صرخة ,,اخروطي ,, صرخة غبرة, المهم اخروطي ترك اللعّب ومشه لهله وهوه یبچی ویفرک , ب ……,

چنّه تقريبا جيل معه اخروطي وعبيّس وآخرين من قريتنا, وچنه نمشي للمدرسة نويّة , الأرض طين وبالشّته برد وچنّه حافين وأبطرج الدشداشة ما حدرها شي.

چنه ابصّف الثاني ويوم من الأيام المعلّم گال أنّه ( من باچر لاتيون ابدشداشة , ولازم تشترون امگصر وقميص!!. وكل من ييي بالدشداشة نطرده من المدرسة !!.

الحگيگة ما چنّه انعرف ( مگصر, و, لا القميص), وبعدين ما عدنه فلوس خاطر نشتري غير الدشداشة ( مگصر وقيص). يعني الاغلبيّة ما چان عدهم يشترون. ّ

صاريوم باچر ولمّا ايينه للمدرسة تدرون المعلّم اشسوّه بينه؟!. چان امحضّرله مگراض وكل واحد اللّي لابس دشداشة گرضها من حد صرته وخلاّنا من الصرة وتحت عرايه , يعني صرنه كل احنه ( سكس) نعم صرنه ( سكس گبل لا الاوربيين ايصيرون سكس).

خلصّنه ذاك اليوم عرايه بالصف!! مثل الصخلة اللي دائما ذيلها شايل وضاله عريانة.

رجعنا لهلنا ابهاي الحاله ولاچن أهلنا ما يتجرئون وايحاچون المعلم و لانّه ( أبن الحكومة) وهو ينفّذ أمر الدولة العجميّة .

بگينا حيرانين.. اذا ما نشتري قميص وامگصر المعلم يطردنه من المدرسة ومن جهة أخرى أهلنا لاعدهم فلوس يشترون انّه, ولکن اتمكنوا من شرايت المگصر بس.

فشفنه ماكو غير أن نتشكّل بالدشداشة ونحطها حدر المگصّر. فصبحنا على المدرسة بهاي الحالة, يعني البطون يايه جداّم من شدّة الدشداشة, ولاچن الحمدلله المعلم ما گال شي, ولاچن المشكلة اهناه وهو عدما نريد نركض أو نلعب , شدّة الدشداشة تنحل ويطلعن اذيال الدشداشة منّا ومنّا مثل اذانات الفيل.

چنه أيام التعطيل نروح لسوگ الخفاييّة نبيع ( اليرّاد) على العجم, چنّه انكضّه بلاش وناكل المكنة ( المكنة هي النثيّة واحلى طعم) وانبيع على العجم ( العصفور) و ( العصفور هو الذكر), والعصفور أصلا ما بيه لحم , يابس و زفر, ولاچنهم ايطيحونلک عليه موته.

فاشترينه من بيع اليرّاد على العجم , اشترينه المگصّر والقميص , واله غيرها ماچان عدنه.

 

 

المسولفچی : أبو داري الأحوازي

‏الجمعة‏، 16‏ كانون الثاني‏، 2015

التغريدات

  • It seems like you forget type any of your Twitter OAuth Data.