أخر الأخبار

ضاع ابتر بين البتران


TomJerry

باسم الله خالق الكون والمكان:

 

سالوفتي اليوم ويّاكم اسمها:

 

((ضاع ابتر بين البتران))

 

وهذه موش من سوالف جدتّي، لا، لكونها سالفة حگیگیّة..

 

بلیوم چنّه ازغار, وچنه نگره باالابتدائية في قرية نائية جدا, من لوا ء ميسان. فمدرستنا چانت مبنیّة من طين وسگفها من بواری وخشب قوق. چان عدنه نهر ماي واحد هم نشرب منّه وهم تورد الحيوانات منّه أو هم نسبح بيه وهم نغسل موتانه بيه, وهم نغسل أهدومنه بيه ,وهم نتسبّع بيه. .. وهذا النهر چان حفروه أهلنا من الکرخة ( چنه نسمیها الشط الچبیر) ويصب هذا النهر صوب الكرخة العمية ولكن يتشعّب شعب منها الحميدية ومنها الهوبية ومنها أبوأيواوه. چنّه نروح للمدرسة بطرج الدشداشة ولا چان حدر الدشداشة نلبس شي ( يعني يبگه کل شی یتلولح). کهربة لاچانت ولاچن چنّه نسوّي البطل نترسه نفط ونحط الفتيلة من لب البرديّة ونغلگها بعیینة.

المهم, چان اکو چتیّب مال شعر والچاتبه واحد ايراني فارسي يسمونه ( عبيد الزاكاني ) وهو شاعر ساخر لحكومة الشاه البهلوي, چان اسم الچتیّب ( الگط والفار ). چان هذا الچتیب الشعري ممنوع من گبل الحکومة وچان جزو القائمة السوداء في جهاز ( سافاك). وانتم تدرون كل شي الممنوع تصير سولة بالناس حتى یگرونه أو يشوفونه وأنه جزو هاي لناس اللّي بيها سولة, سولة چبیرة هم موش زغيرة, موش چنت سياسي, لا, ولاچن السولة مالها حاية بسّياسي أوغیر السياسي.

معهذا من حسن الحظ ماچان احد من اهلي يعرف الچتابة و لا الگرایة. فآنه بالیل اگوم اگره هذا الچتاب على ضوء البطل أوچانت عدنه صريفة مالت گصب نص منها للهوایش والنص الثانی احنه، وحتى عدما تبول الهايشة البول ايطفّر علينا و چانت ریحة البول واللهي مثل ريحة بت السودان أو ريحة اللاّونطة ( چانت احلئ ريحة عدنا ريحة اسمها ( بت السودان ) واحلئ صابون چان نوع صابون اییّيبونه غچغ واسمه ( لاونطة) وريحة هذن الاثنين أصلا ما تطلع بيوم أو يومين.

المهم,, چنت اگره هذه الچتاب وآنه خایف بینما محّد يمّي ولا أحد گربالی و لكن تدرون ليش ؟( لآنّه صایرة بيّه شمرة من الگماط)

تژيکم السالفة, اگولن سالفة ( الگط والفار):

الشاعر و اللّي مسولف هذه السالفة ( عبيد الزاكاني) محدّد مچان العرکة اللي دارت بين = الگط والفار= بالضبط بمنطگت ( حمدان) واللّي بالفارسية يسمونها ( همدان).

ایگول ( عبید الزاكاني) عد ما بلشت المعركة الضارية وطالت أيام فانتصر ( الفار ) على (الگط ) فاسّروا البزّون ( أيّ الگط) ويابوه وحطّوه ابمچان وحطّوا عليه نواطير, وعلّگوا برگبته دراغ, وگاموا ینگلون علیه جمیع ما یشتهی حتّى صارلكم اسمن ما چان گبل ما یتآسّر.

ولكن گولولی المن حطّوا برگبته دراغ حسبالكم؟؟!.

آنه اگلکم بهذا السّر, بسلا تگولون ( للحلف الأطلسي بيه – النيتو), حطّوا برگبته دراغ خاطر اذا ایگوم جلالة حضرته من مچانه ویرید يشتهي ياكلّه ( فارة) فايگوم ایخرخش دراغه وعد هذا يسمعون النواطير حس الدراغ ویگومون ويمنعونه من عمله!

هم اتحاروبوا ويّاه ( ظاهريا) واسّروه وتعبوا , ولكن علوّيش ما يكتلونه , وليش يخسرون عليه نواطير وأكل وشرب اللّي يشتهيه؟؟!! . اتصوّر أنّ الجماعة في ( الحلف الأطلسي النيتو) هم أحسن منّي وحتى منكم علوّيش مایکتل ( الفار ) , ( الگط – البزّون), فهم ينظرون عليه موش بعين ( گط , لا , ابعين = سبع = والسبع بالعربي الفصيح يسمونه = اسد!!).

الربّاط:

خو ما يسمعنه أحّد اذا انگول لیش ؟ ارجوکم عاینوا زين ، عاینوا فرّاريكم خاف أفضولي( حشاكم ) يتصنّط وايسوّيلنا طلابة وانتم تدرون أنه بيّه شمرة من الگماط ,, يمّة,,.

الفار يريد يضم هذا البزون اللي رباّه وحتى كان ربّا ابوه، وگاعدين يخسرون عليه أكل وشرب ونواطير وخدم, ايضمه لليوم اللي يريدونه لزعبلة العالم ويريد الفار يعدل من هذا البزون ( البزّون الاعور ) لانهم الفئران سامعين أنّ الناس ايخافون من ( الدجال الاعور) ومن ( يأجوج ومأجوج ).

هسّه آنا شللّي بهاي السوالف!!؟؟ ولكن شسّوي هم بيّه سولة!!

اللهم اكفينا شرّ يأجوج ومأجوج وخاصة الدجال الاعور.

 

بقلم: ابو داري الأحوازي

التغريدات

  • It seems like you forget type any of your Twitter OAuth Data.